پوهنې وزارت وايي؛ هرات ولایت کې د ۲۵ ښوونیزو بنسټونو د بیارغونې چارې د ۲۰ مېلیونه او ۱۶۴ زره افغانیو په لګښت پیل شوې.
د پوهنې وزارت د مسولینو په وینا؛ د یاد وزارت له بودیجې څخه د هرات ولایت په مرکز او ولسوالیو کې د ۲۰ مېلیونه او ۱۶۴ زره افغانیو په ارزښت د ۲۵ تعلیمي مرکزونو د ترمیم او بیارغونې چارې پیل شوې.
د هرات پوهنې رییس مولوي رحمت الله جابر د یادو پروژو د عملي چارو د پيل په ترڅ کې ویلي، چې دغه پروژې د پوهنیزو بنسټونو د بیارغونې او زده کوونکو په ځانګړي ډول د لرې پرتو او محرومو سيمو د زده کوونکو لپاره د مناسب ښوونیز چاپېريال د برابرولو په موخه پلې کېږي.
نوموړي زياته کړې، په یادو پروژو کې د مدارسو او ښوونځيو اساسي ترميمول، د درسي ټولګيو بيارغونه او د نورو اړینو اسانتياوو برابرول شامل دي.