د کډوالو ستونزو ته د رسېدنې عالي کمېسیون د دولس ګونو کمېټو د رییسانو غونډه د افغانستان اسلامي امارت د ریاست الوزرا اداري مرستیال مولوي عبدالسلام حنفي په مشرۍ او د یاد عالي کمېسیون د ځینو غړو او رییسانو په ګډون ترسره شوې.
په دې غونډه کې لومړی د یادو کمېټو مسولینو د ورسپارل شویو دندو په اړه د خپلو کړنو او فعالیتونو په اړه راپور وړاندې کړی.
وروسته له ګاونډیو هېوادونو څخه راستنو شویو کډوالو ته د دایمي اسکانو د وېش بهیر د چټکوالي د څرنګوالي، د ګومارل شویو ادارو او ولایتي کمېټو له لوري له تثبیت وروسته هغو کډوالو ته د ځمکې وېش چې کور نه لري، د کډوالو په خېمو کې د څښاک اوبو د کموالي ستونزې د رفع کولو او همدارنګه په هغو ولایتونو کې د کډوالو ښارګوټو کې د زیربنایي کارونو پیلول چې مقدماتي کارونه یې بشپړ شوي او کډوالو ته په کې ځمکې وېشل شوې دي، خبرې او هر اړخېزه ارزونه شوې او په اړه یې لازم تصمیمونه نیول شوي دي.
د غونډې په پای کې د بېلابېلو کمېټو په دندو او راستنېدونکو ته د غوره خدماتو په برابرولو ټینګار شوی.