د هیواد د فوټبال تر ۱۷ کلنو کم عمره ملي لوبډله د مرکزي اسیا اتلولۍ (کافا) سیالیو کې د برنزو له مډال او درېیم مقام ګټلو وروسته هېواد ته راستنه شوه.
یادې لوبډلې په خپله لومړۍ سیالۍ کې قرغیزستان هېواد ته د ” ۳-۰” ګولونو په توپیر ماتې ورکړه، په دویمه سیالۍ کې یې له تاجکستان څخه د ” ۱-۳” ګولونو په توپیر ماتې وخوړه او په درېيمه لوبه کې یې ایران ته د “۱-۲ ” ګولونو په توپیر ماتې ورکړه او په دې سره یې په کافا سیالیو کې درېیم مقام وګاټه.
د لوبډلې د ښه راغلاست په مراسمو کې د فوټبال فدراسیون ویاند او په کافا سیالیو کې د برخه وال پلاوي غړي هاشمي ويلي؛ ”لوبغاړو په خورا لوړ مورال لوبه وکړه، د افغانستان لپاره په کافا سیالیو کې دومره پیاوړیو لوبډلو ته ماتې ورکول او درېیم مقام ګټل تاریخ جوړونکی او د افغانستان د فوټبال د راتلونکي لپاره هیله او ښه زېری دی. “
د اسیا مرکز اتلولۍ یا کافا سیالۍ د زمري میاشتې په ۲۹ مه د تاجکستان هېواد په کوربتوب پیل او د وږي میاشتې تر پنځمې نېټې یې دوام وکړ.
په یادو سیالیو کې افغانستان، قرغيزستان، تاجکستان، ازبیکستان او ایران برخه اخیستې وه.