د افغانستان برېښنا شرکت او د اوزبیکستان د انرژۍ وزارت تر منځ د ۲۴۳ میلیونه ډالرو په ارزښت د برېښنا لېږد او وېش د څلورو پروژو تړونونه لاسلیک شول.

دغه تړونونه د ریاست‌الوزرا اقتصادي مرستیال ملا عبدالغني برادر اخوند او د افغانستان لپاره د دغه هېواد د ځانګړي استازي عصمت الله ایرګاشیف په حضور کې لاسلیک شول.

د یادو تړونونو د لاسلیک په مراسمو کې ډاکټر عبدالباري عمر ویلي، چې په دې تړونونو کې د ۲۱۰ کیلو مټرو په اوږدوالي د ۵۰۰ کیلو ولټ مزي غځولو سربېره د الوان دښتې او ارغندي سب‌سټېشنونو د ظرفیت لوړول او له ارغندي سب‌سټېشن څخه ننګرهار ته د ۲۲۰ کیلو ولټ مزی غځول او هلته ورته د شیخ مصري سب‌سټېشن جوړول شامل دي.

د چاپېریال ساتنې ملي ادارې په نوښت د ختیځ زون په کچه د هېواد د چاپېریالي وضعیت ارزونې مشورتي ورکشاپ په ننګرهار ولایت کې پیل شو.

په دې ورکشاپ کې د ننګرهار تر څنګ د نورستان، کونړ او لغمان ولایتونو استازو ګډون کړی، تر څو د خپلو سیمو د چاپېریالي وضعیت په اړه معلومات او وړاندیزونه شریک کړي.

د یاد ورکشاپ د پرانیستې په مراسمو کې د چاپېریال ساتنې ملي ادارې لوی رییس مولوي مطیع‌الحق خالص، د ادارې مسلکي ټیم او د رها موسسې مسولینو ګډون کړی وو.

مولوي مطیع الحق خالص د ورکشاپ موخې په تفصیل سره تشریح کړې او ویلي یې دي، چې د افغانستان د چاپېریالي وضعیت د اقلیمي بدلون له امله له جدي ننګونو سره مخ دی.

نوموړي زیاته کړې: “په هېواد کې وچکالۍ، د ځنګلونو له منځه تلل، د اوبو د سرچینو کمښت او د هوا د ککړتیا زیاتوالی هغه ستونزې دي، چې د خلکو د ژوند پر ټولو برخو یې منفي اغېز کړی دی. د دې ستونزو ریښه یوازې د خلکو ډېروالی نه دی، بلکې د ناپوهۍ، بې‌نظمۍ او د طبیعي سرچینو د ناسم استعمال له امله راپیدا شوې دي.”

ښاغلي خالص ټینګار کړی، چې د اقلیم بدلون مهار یوازې د چاپېریال ساتنې ادارې کار نه دی، بلکې د ټولو امارتي او ملي ادارو، خلکو او نړیوالو سازمانونو ګډو هڅو ته اړتیا لري.

هغه په دې برخه کې د ټولنې د بېلابېلو قشرونو رول حیاتي بللی او زیاته کړې یې ده، چې د خلکو د پوهاوي لوړول د هر ډول اصلاح او پرمختګ بنسټ جوړوي، نو لازمه ده چې ټول په ګډه د خپل هېواد د سمسورتیا او پرمختګ لپاره کار وکړو.

د رها موسسې مرستیال عزت الله صدیقي د اقلیم بدلون او وچکالۍ پر وړاندې د ګډو هڅو اهمیت روښانه کړی او د همدې موسسې متخصص محمد طارق عزیز د ارزونې د میکانیزمونو او راپور ورکولو اړوند ځانګړی پرېزنټیشن وړاندې کړی دی.

ورکشاپ په ګروپي بحثونو پای ته رسېدلی، چې ګډونوالو خپلې طرحې او نظریات د ساحوي واقعیتونو پر بنسټ پکې مطرح کړي دي.

د کډوالو او بېرته راستنېدونکو چارو وزیر مولوي عبدالکبیر د هندوسان لپاره د تېرې ادارې له وروستي سفیر فرید ماموندزي سره په کتنه کې ویلي، چې اسلامي نظام د هر هېوادوال د امنیت ساتونکی دی.

نوموړي زیاته کړې، چې د افغانانو یووالی او د هېواد بیارغونه د اسلامي امارت لومړیتوب دی.

د مولوي عبدالکبیر په وینا، د اسلامي امارت له عمومي عفوې څخه وروسته له هېچا څخه د تېرو کړنو پوښتنه نه کېږي.

ورته‌مهال ښاغلي ماموندزي د اسلامي امارت له همکاریو مننه کړې او په افغانستان کې اوسني مثبت بدلونونه یې د راتلونکي لپاره مهم بللي دي.

د اوزبیکستان د انرژۍ وزیر جورابیک میرزا محمدوف او د افغانستان لپاره د اوزبیکستان هېواد ځانګړی استازی عصمت الله ایرګاشیف پلازمېنې کابل ته را ورسېدل.

یاد پلاوي د امارتي شرکتونو له لوی رییس مولوي احمد جان بلال او د افغانستان برېښنا شرکت له لوی اجرائیوي رییس ډاکټر عبدالباري عمر سره وکتل او د فتحې څلورمې کلیزې په مناسبت یې مبارکي ورکړه.

ټاکل شوې، په راتلونکو څو شېبو کې به له اوزبیکستان څخه یاد راغلي پلاوي او د افغانستان برېښنا شرکت تر منځ د څلورو لویو پروژو تړونونه لاسلیک شي، چې دا به د برېښنا پراختیا او وېش کې تر ټولو ستر ګام وي.

د هېواد د المپیک، بدني روزنې او ورزش لوی رییس احمدالله وثیق په افغانستان کې د قزاقستان له سفیر ګزیز اکباسوف سره وکتل.

په دغه لیدنه کې دواړو خواوو د افغانستان او قزاقستان تر منځ د ورزشي اړیکو د پراختیا پر اړه خبرې کړې او په ورزشي برخه کې ‌یې د دوه‌ اړخیزو همکاریو پر پیاوړتیا ټینګار کړی دی.

مولوي احمدالله وثیق د هېواد د ورزش ادارې د وروستیو فعالیتونو، پروګرامونو او لاسته‌ راوړنو په اړه معلومات وړاندې کړي او ویلي یې دي، چې ورزش د ملتونو تر منځ د کلتوري او ټولنیزو اړیکو د پیاوړتیا لپاره مهم رول لوبولای شي.

نوموړي زیاته کړې، چې افغانستان د دوستو هېوادونو، په ځانګړي ډول له قزاقستان سره د ورزشي اړیکو د پراختیا لپاره چمتو دی. دغه‌راز د دواړو هېوادونو د ورزشکارانو تر منځ یې د اړیکو د زیاتوالي غوښتنه کړې ده.

په افغانستان کې د قزاقستان سفیر له افغانستان سره د ورزشي اړیکو په پراخېدو خوښي ښودلې او ټینګار یې کړی، چې ورزش د ملتونو تر منځ د اړیکو یو پُل دی او لا ډېرې همکارۍ رامنځته کولای شي.

هغه د دواړو هېوادونو د ورزشکارانو تر منځ د دوستانه سیالیو د ترسره کولو وړاندیز کړی او هیله یې ښودلې، چې د افغانستان ورزشکاران دې د قزاقستان په ورزشي سیالیو کې ګډون وکړي او همداراز قزاقي ورزشکاران دې افغانستان ته راوبلل شي.

په پای کې دواړو خواوو د افغانستان او قزاقستان تر منځ د ښو اړیکو او ورزشي همکاریو پر دوام ټینګار کړی او هیله ‌یې څرګنده کړې، چې دا تعاملات به په نږدې راتلونکې کې عملي او اغېزناکې لاسته‌راوړنې ولري.

 ټولګټو وزارت وایي، چې په تېره یوه اوونۍ کې د ۱۴۰۴ هـ.ش. کال د زمري مياشتي له ۱۷مې نيټې څخه تر ۲۳ مې نېټې پورې د یاد وزارت د اوسپنې پټلۍ له لارې ۸۷ زره او ۷۸۳ مټریک ټنه انتقالات شوي دي.

یاد وزارت زیاته کړې، د حیرتان بندر له لارې ۵۵ زره او ۳۹۵ ټنه، د اقینې بندر له لارې اته زره او۱۲۰ټنه، د تورغونډۍ بندر له لارې ۱۳ زره او ۹۰ ټنه او د خواف –هرات ۱۱ زره او ۱۷۸ له لارې ټنه انتقالات شوي، چې ټولټال ۸۷ زره او ۷۸۳ ټنه نفتي، غیر نفتي او نور مواد دي، هېواد ته وارد او صادر شوي دي.

د دې وزارت د معلوماتو له مخې، د انتقالاتو له ډلې یوه برخه صادرات دي، په تېره یوه اوونۍ کې ۱۹۷ټنه صادرات شوي، چې لويه برخه یې وچه میوه او د انارو جوس دي.

 هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کې اقتصادي ثبات، پرمختګ او ځان بسياينې ته لاره هواریږي.

 ټولګټو وزارت هڅه کوي، ترڅو د لا زیاتو انتقالاتو لپاره مناسب شرایط برابر او سوداګرو ته لا زياتې اسانتياوې برابرې کړي.

 په انقره کې د افغانستان اسلامي امارت سفارت وايي، چې په دې هېواد کې د یاد سفارت له‌خوا د امریاکایي اشغال پای او د فتحې ورځ د اسد ۲۴مه ونمانځل شوه.

په دې لمانځغونډه کې د افغانستان اسلامي امارت سفیر شیخ صنیع الله فرهمند وینا کړې او ویلي: “نن موږ دلته د هغه تاریخي ورځې د لمانځنې لپاره راټول شوي یوو، چې د افغان ولس د اوږدې مبارزې، زغم او قربانیو پایله ده.”

 نوموړي زیاته کړې، اوسنی امنیت او نظام د الله تعالی ستر نعمت دی او باید د هېواد د پرمختګ او ابادۍ لپاره ترې گټه واخیستل شي.

د یادونې وړ ده، چې په یاده لمانځغونډه کې د ترکیې د بهرنیو چارو وزارت استازو، په کوربه هېواد کې د ګڼو هېوادونو سفیرانو، ډیپلوماټانو، علماوو، سياسي شخصیتونو او په ترکیه کې مېشتو هېوادوالو ګډون کړی وو.

د افغانستان برېښنا شرکت عمومي اجرایيوي ریيس، د «زازو افغانستان» او «کابل ملي» شرکتونو مسولينو تر منځ د هرات برېښنا ثبات او پياوړتيا په موخه د نږدې ۴۱ ميليونه ډالرو ګډې پانګونې تړونونه لاسليک شول.

د برېښنا شرکت د معلوماتو له مخې، له نورالجهاد سب‌سټېشن څخه تر پُل هاشمي او له پُل هاشمي څخه تر د حوت ۲۴ شهیدانو سب‌سټېشن پورې د ۲۲۰ کیلوولټه برېښنا د لېږد مزي غځول، د پُل هاشمي او د حوت ۲۴ شهیدانو سب‌سټېشنونو جوړول، او په نورالجهاد سب‌سټېشن کې د لین بي پراختیا د تړون اساسي برخې دي.

د یاد شرکت په وینا، دغه پروژې به د برېښنا د ثبات او پیاوړتیا په موخه د دوو کلونو په موده کې بشپړې شي، چې له مخې به یې هرات له ډاډمنې برېښنا برخمن شي.

د لوړو زده کړو وزارت وایي، چې د دې وزارت وزیر شیخ نداء محمد ندیم د بامیان پوهنتون ۶۲۰ تنو محصلینو په فراغتغونډه کې د ګډون تر څنګ په دغه پوهنتون کې یو شمېر پروژې پرانیستې.

نوموړي د بامیان ولایت ته د خپل د رسمي سفر پر مهال د یاد ولایت پوهنتون د محصلینو په فراغتغونډه کې ویلي، چې محصلین باید په خپل مسلک کې تخصص ترلاسه کړي او په ډېر اخلاص د افغانستان د ودانولو هڅه وکړي.

ښاغلي ندیم زیاته کړې، د افغانستان اسلامي امارت ژمن دی، چې د خپلو ځوانانو لپاره د زده کړو اسانتیاوې او کار زمینه برابره کړي. 

د لوړو زده کړو وزیر د اسد ۲۴مې، فتحې ورځې ته په اشارې سره ویلي، چې د افغانستان په جهاد کې ټولو افغانانو ونډې اخیستې، موږ د جهاد په ډګر کې بریالي شوي یو او اوس د خدمت کولو امتحان سره مخ یو. 

همدارنګه نوموړي د یاد سفر پر مهال د بامیان پوهنتون داخلي سړکونو، احاطوي دېوال، د لیلیې سولر سیستم او کانتین پروژې هم پرانیستې دي. 

په چین کې د افغانستان اسلامي امارت سفارت وايي، چې په دې هېواد کې د یاد سفارت له‌خوا د امریاکایي اشغال پای او د فتحې ورځ د اسد ۲۴مه ونمانځل شوه.

یاده نمانځغونډه کې د بېلابېلو هېوادونو سفیرانو، ډیپلوماټانو، د کوربه هېواد چارواکو، ځینو اکاډیمیکو شخصیتونو، افغان سوداګرو او زده‌کړیالانو ګډون درلود.

یاد سفارت زیاته کړې، د دغې نمانځغونډې په پیل کې هغه لنډ مستند، چې د اسلامي امارت د تاسیس، د امریکايي اشغال پیل او له اشغال څخه د خلاصون پر دورو چمتو شوی وو، ګډونوالو ته وړاندې شو.

ورپسې د اسلامي امارت امارت لوی سفیر مولوي بلال کریمي په دې غونډه کې د دې ورځې د ارزښت، له نړۍ سره د اسلامي امارت د مثبتو پالیسیو، په ځانګړي ډول له چین سره د ډیپلوماټیکو او نورو همکاریو په اړه وینا کړې ده.

ورته‌مهال د چین ولسي جمهوریت د اسیا برخې مشر ښاغلي لیو جین سونگ په خپلو خبرو کې افغانانو ته د دې ورځې مبارکي ویلې او افغانستان یې د چین یو ښه ګاونډی بللی دی.

نوموړي دغه‌راز له افغانستان سره د اړیکو او بېلابېلو برخو کې د لا زیاتو همکاریو ډاډ ورکړی دی.

د یادونې وړه ده، چې غونډه د افغانستان سفارت له لوري د افغاني دودیزو خوړو د مېلمستیا په وړاندې کولو پای ته رسېدلې ده.