د کرنې وزیر مولوي عطاء الله عمري په مشرۍ. د اوبو او انرژۍ او د ټولګټو وزارتونو مرستیالانو، د ملي تدارکاتو لوی رییس، د چارو ادارې د پالیسۍ مرستیال، د ملي پراختیا شرکت رییس او د اړندو ادارو د یو شمېر کارپوهانو او سلاکارانو په شتون کې د قوش‌تیپې کانال د لومړي فاز (دویم لاټ) د ډیزاین او ودانیو جوړولو قرارداد د بیا کتنې، ارزونې او لاسلیک په موخه غونډه وشوه.

په دې غونډه کې د اوبو او انرژي وزارت مرستیال انجنير مجيب الرحمن عمر اخوندزاده، د ټولګټو وزارت مرستيال مولوي عبدالکريم فاتح، د چارو ادارې د پاليسۍ مرستيال عبدالباري عاطف، د چارو ادارې د تدارکاتو لوی رييس مولوي عبدالباقي منصور، د ملي پراختیا شرکت رییس عبدالرحمن عطاش، د کرنې وزارت د دفتر رییس ملا محمد حسین خورشید او د کرنې وزارت سلاکار عزیز الرحمن رحماني شتون درلود.

ټاکل شوې، چې د بلخ په ولایت کې د قوش‌تیپې کانال لومړي فاز د ډیزاین او ودانیو جوړولو قرارداد د څه باندې ۵.۲ میلیارده افغانیو په ارزښت د قرارداد تر لاسلیک وروسته د درېیو کلونو په موده کې د ملي پراختیا شرکت ته وسپارل شي.

د تدارکاتي چارو د څرنګوالي د څېړلو او د قرارداد د لاسلیک په موخه د مولوي عطاء الله عمري په مشرۍ یو ګډ پلاوی د یادو ادارو د استازو په شتون کې وګومارل شو، ترڅو په دې برخه کې تدارکاتي ستونزې هوارې او د اړوندو ادارو ترمنځ د کاري هوکړه لیک تر لاسلیک وروسته دې موضوع بېرته اقتصادي مرستیالۍ ته وړاندې کړي.

په همدې موخه د کرنې وزیر مولوي عطاء الله عمري په شتون کې د قوش‌تیپې کانال د جوړولو په برخه کې د اړوندو ادارو ترمنځ د همکارۍ هوکړه لیک لاسلیک شو.

د قوش‌تیپې د اوبولګولو ستر کانال چې د جوړولو کار په ۲۰۲۲ کال کې د اسلامي امارت تر واکمنۍ وروسته پیل شو، د هېواد په شمال کې د اوبو د لېږد تر ټولو لویه پروژه ده.

د یاد کانال ټولیز اوږدوالی ۲۸۵ کیلومتره، پلنوالی یې ۱۵۲ متره او ژوروالی یې له ۸.۵ څخه تر ۱۲.۵ مترو پورې دی.

د قوش‌تیپې کانال د لومړي فاز (دوم لاټ) چارې د ملي پراختیا شرکت له خوا تر تدارکاتي پړاوونو وروسته پېلېږي.

رویټرز خبري اژانس د مصر د دوو امنیتي سرچینو له قوله ویلي، چې قاهره کې د حماس او اسرائیلو تر منځ د غزې د اوربند په تړاو روانې خبرې له هوکړې پرته پای ته رسېدلې دي.

یاد اژانس زیاتوي، چې دواړه لوري د غزې د اوربند او بندیانو د خلاصون په تړاو د منځګړو هېوادونو له لوري په وړاندې شویو څو مواردو کې هوکړې ته نه دي رسېدلي.

ورته مهال د حماس یو لوړ پوړي چارواکي اسامه حمدان ویلي، چې غزه کې د بیړني اوربند په تړاو د بایډن د حکومت وروستۍ څرګندونې ناسمې او د ټاکنیزو موخو لپاره دي.

اسرائیلي رژیم د سولې له مذاکرتو سره-سره غزه کې خپلو وحشتونو ته دوام ورکړی او هره ورځ په بېلابېلو سیمو بریدونه کوي او د غزې اوسېدونکو ته د وتلو او بې‌ځایه کېدو امرونه کوي.

تازه د الجزیرې نړیوالې خبري شبکې د راپور پر اساس؛ اسرائیلي یرغلګرو د غزې النصیرات کمپ په شمال کې د بې‌ځایه شويو فلسطینیانو پر یوه ښوونځي هوايي برید کړی، چې ګڼ کسان پکې شهیدان او ټپیان شوي.

د فلسطین خبري اژانس وفا هم د یاد برید خبر ورکړی او ویلي یې دي، چې په شهیدانو او ټپيانو کې ښځې او ماشومان هم شامل دي. د دې برید د دقیقو تلفاتو په اړه تر اوسه راپور نه دی ورکړل شوی.

د امر بالمعروف، نهې عن‌المنکر او شکایتونو اورېدلو وزیر شیخ محمد خالد الحنفي د امیر المؤمنین حفظه الله د فرمانونو، حکمونو او لارښوونو د لا ښه پلي کېدو، عامه پوهاوي او د خلکو د ستونزو د اورېدو په موخه سرپل ولایت ته سفر کړی.

شیخ محمد خالد الحنفي د یاد ولایت د غونډو په تالار کې د دې ولایت له ملکي او نظامي مسولینو، علمای کرامو، خطیبانو، قومي مخورو او ګذر وکیلانو سره په ستره جوړه شوې غونډه کې ګډون کړی.

نوموړي په دې غونډه کې وویل؛ کفري یرغلګرو پوره هڅه وکړه ترڅو افغانستان کې خپل کلتور او لیدلوری پلي کړي، خو ناتوانه وو او شرمیدونکې ماتې یې وخوړه.

د امر بالمعروف، نهې عن‌المنکر او  شکایتونو اورېدلو وزیر زیاته کړه، افغان مجاهدینو په مېړانه او قوت سره غربي ښکېلاک‌ګر دې ته اړ کړل چې هېواد پرېږدي.

د ښاغلي حنفي په وینا، نړیوالو پرته له دې چې کوم حقوقي او قانوني جواز او پلمه ولري پر افغانستان یرغل وکړ.

شیخ محمد خالد الحنفي وویل، افغان مجاهدینو په مېړانه او قوت سره غربي ښکېلاک‌ګر دې ته اړ کړل چې هېواد پرېږدي.

د امر بالمعروف، نهې عن‌المنکر او د شکایتونو اورېدلو وزیر سرپل کې ولسي غونډې ته په خپلو خبرو کې زیاته کړه، افغان مجاهدین په تش لاس او کمو امکاناتو وتوانېدل د ۱۱ ورځو په موده کې راغلي یرغلګر او د هغوی ملاتړي مات کړي او خپلواکي ترلاسه کړي.

نوموړي وویل؛ پر قوم، سمت او ژبې ویاړ او تعصب اسلام کې ځای نلري د اسلامي حکومت تر چتر لاندې ټول سره وروڼه او یو لاس یو.

ښاغلي حنفي زیاته کړه، امربالمعروف او نهې عن‌المنکر الهي حکم دی او ټول یې په ترسره کولو مکلف یو.

په دې غونډه کې نوموړي ټینګار وکړ، چې افغانان حبس او شهادت په ورین تندي مني خو هیڅکله اشغال نشي منلی.

شیخ محمد خالد الحنفي پر مسولینو، علماوو او قومي مشرانو غږ وکړ، ترڅو د معروفاتو اقامه او منکراتو مخنیوي کې برخه واخلي او د‌ محتسبینو سره همکاري وکړي.

د امر بالمعروف، نهې عن‌المنکر او د شکایتونو اورېدلو وزیر سرپل کې ولسي غونډې ته وویل، د امربالمعروف او نهې عن‌المنکر وزارت دنده لري ترڅو ټول الهي احکام په بشپړه توګه پلي کړي.

د اطلاعاتو او کلتور وزارت د نشراتو معينيت اړوند اطلاعاتو ته د لاسرسي رياست له لوري د وياندويانو د کاري چوکاټ په اړه له دوی سره د عالیقدر اميرالمومنين حفظه الله د فرمان تشريحي غونډه ترسره شوه.

ياده غونډه کې د چارو ادارې لوی ریيس شيخ الحديث نورالحق انور، د اطلاعاتو او کلتور وزارت د ګرځندوی، مالي او اداري چارو مرستیال مولوي قدرت الله جمال، د هنر او کلتور مرستیال مولوي عتيق الله عزيزي، د نشراتو معينيت وارسي کوونکي مولوي ضیاء الحق حقمل، اطلاعاتو ته د لاسرسي رياست ریيس مولوي رحمت الله نړيوال، د دولتي ادارو د مطبوعاتو او نشراتو ریيسانو او وياندويانو برخه اخستې وه.

په دې غونډه کې د چارو ادارې لوی ریيس شيخ نورالحق انور د اميرالمومنين حفظه الله فرمان په جامع ډول سره توضيح او تشريح کړ.

د عالیقدر اميرالمومنين حفظه الله په فرمان کې يادونه شوې ده، چې د امارتي ادارو وياندویان مکلفيت لري، د افغانستان اسلامي امارت موخې، پاليسۍ، فعاليتونه، لاسته راوړنې او نور اطلاعات د خپل کاري چوکاټ او پالیسي په نظر کې نیولو سره رسنيز او خپاره کړي.

 ورپسې د مرکزي وياندويانو له لوري د فرمان اړوند پوښتنې وشوې، چې د شيخ نورالحق انور له لوري په تفصيل سره ځوابونه ورکړل شول.

همدارنګه د اطلاعاتو او فرهنګ وزارت د هنر او کلتور مرستیال مولوي عتيق الله عزيزي غونډې ته په خپله وينا کې وویل؛ د اسلامي امارت ټولې تګلارې او پاليسۍ په داسې ډول ترتيب شوې دي، چې عملي کول يې د دواړو جهانونو د کامیابۍ سبب ګرځي.

نوموړي زیاته کړه؛ د افغانستان اسلامي امارت تل اعتدال په پام کې نيولی دی، د کفري نړۍ له لوري د ډيرو سختيو سره بيا هم اسلامې امارت د معتدله پاليسۍ له امله بريالی شوی دی.

په پای کې د اطلاعاتو او کلتور وزارت د ګرځندوی، مالي او ادارې چاور د مرستیال مولوي قدرت الله جمال ویاندویانو ته توصیه وکړه، چې په تاسو لوی باور او اعتماد شوی، نو تاسو هم په کامل اخلاص سره خپلو چارو ته پاملرنه وکړئ.

د شهیدانو او معلولینو چارو وزیر ملا عبدالمجید اخوند جوزجان ولایت ته سفر کړی.

ملا عبدالمجید اخوند د دې سفر په ترڅ کې د جوزجان ولایت د شهیدانو او معلولینو چارو ریاست د کاري بهیر د ارزونې ترڅنګ د فدایانو کورنېو لیدو او پوښتنې ته ورغلی، د هغوی ستونزې یې اوریدلې، د شهیدانو پاک روح ته یې دعا کړې او د هغوی کورنیو سره یې نغدي مرستې کړې دي.

نوموړي یاد ولایت ته د خپل سفر اصلي موخه د شهيدانو او معلولینو چارو ریاست د فعالیتونو ارزونه بللې.

ښاغلي اخوند د یاد ریاست کارکوونکو سره په لیدنه کې ویلي؛ دې ولایت ته زموږ د سفر یوه مهمه موخه د شهیدانو او معلولینو له کورنیو سره لیدنه، د هغوی ستونزې له نږدې اوریدل او د هغوی غوښتنو او ستونزو ته رسېدنه ده.

د شهیدانو او معلولینو چارو وزیر د شهیدانو او معلولینو له کورنیو سره په لیدنه کې ورته ډاډ ورکړی، چې د دوی اړتیاوو او ستونزو ته به پاملرنه وشي.

نوموړي ویلي، د اسلامي امارت نظام د مجاهدینو په قربانیو او د ولس په همکارۍ سره را منځته شوی دی او د اسلامي امارت مسولین هڅه کوي ترڅو د خلکو ستونزې او اړتیاوې ته د خپل وس اړوند رسېدنه وکړي.

همداراز ملا عبدالمجید اخوند د شهيدانو وارثينو او معلولينو ته د لا ښه خدمتونو د وړاندې کولو په موخه د ياد رياست مسولينو ته اړینې لارښوونې کړې دي.

د جوزجان ولايت د شهيدانو او معلولينو چارو ریيس مولوي شبير احمد د ياد رياست د فعاليتونو او کړنو  په اړه د راپور وړاندې کولو په ترڅ کې د شهيدانو او معلولينو  کورنيو ستونزو او  غوښتنو ته د پوره رسېدنې ډاډ ورکړی دی.

دغه‌راز د شهیدانو یو شمېر کورنیو او معلولینو هم د اسلامي امارت له ځانګړې پاملرنې څخه مننه کړې ده.

په دې سفر کې چې د وزارت د مالي او حسابي چارو رییس مولوي محمد امین دروېش، د خاصو شهیدانو امر مولوي محمد او د ډېټابېس او معلوماتو رياست د پروژې مالي مسول مولوي شبیر احمد، چې د شهیدانو او معلولینو چارو وزیر ملتیا کوله.

دوی د هغو معلولینو لیدو ته هم تللي، چې د تېر ۲۰ کلن جهاد پر مهال یې د خپل بدن دوه غړي له لاسه ورکړي وو، د هغوی ستونزې هم واوریدل شوې او ورسره یې نغدي مرستې هم کړي.

د یادونې وړ ده، چې تېره ورځ هم د شهیدانو او معلولینو چارو وزیر په بلخ ولایت کې د فدایانو کورنېو سره له نږدي کتلي وو، او هغوی سره  یې نغدي مرستې کړې وې.

د یکشنبې ورځ، د ۲۱/۲/۱۴۴۶ هـ ق نېټه چې ۴/٦/۱۴۰۳ هـ ش نېټې سره سمون خوري.

د هېواد له مختلفو لارو څخه افغان کډوال راستانه شوي او په بېلابېلو برخو کې ورته اړین خدمتونه وړاندې شوي.

بشپړ راپور یې په لاندې ډول وړاندې کیږي:

ننـــــــــګرهــــــار

تورخم ډېورنډ فرضي کرښه

د ثبت، تثبیت او استقبال کمېټه:

د تورخم له لارې ۳۹ کورنۍ چې د غړو شمیر یې ۲۰۷ تنه کیږي، هېواد ته راستنې او ثبت شوي دي.

د ټرانسپورټ او لېږد کمېټه:

له تورخم څخه ۱۷ کورنۍ چې د غړو شمېر یې ۹۵ تنه و، ننګرهار او کابل ولایتونو ته په خوندي توګه لېږدول شوي او یادو کورنیو ته ۷۵ زره افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو تنظیم کمېټې لخوا له ۳۴ کورنیو سره مرسته وشوه، چې ټولې ۲۹۰ زره افغانۍ کیږي.

د خدماتو او روغتیايي چارو کمېټه:

د تورخم په عمري کمپ کې راستنېدونکو کډوالو  ته د روغتیا په شمول مهم خدمات وړاندې شوي:

مخابرات: راستنو شویو کډوالو  ته ٦۵ عدده سیمکارتونه، په وړیا توګه چې وړیا دقیقې او انټرنېټي بستې هم په‌کې فعاله وې، وېشل شوي دي.

کنــــــــــــــدهار

سپین بولدک ډیورنډ فرضي کرښه

د ثبت، تثبیت او استقبال کمېټه:

د سپین بولدک له لارې ۳۱ کورنۍ چې د غړو شمیر یې ۱۵۵ تنه کیږي، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري په تخته پل کمپ کې له ۳۱ کورنیو سره ټولې ۲۵۲ زره افغانۍ مرسته شوې.

د خدماتو او روغتیايي چارو کمیټه:

په  سپین بولدک کې راستنېدونکو کډوالو  ته د روغتیا په شمول لاندې بېلابېل خدمات وړاندې شوي:

خواړه: په سپین بولدک کې کډوالو  ته ۳۲۷ خوراکه ډوډۍ او پاکې اوبه ورکړل شوې.

روغتیا: په سپین بولدک کې ۱۵۸ تنه راستانه شوي کډوال تداوي شوي دي.

همدارنګه ۵۰۸ تنه کډوالو  ته د روغتیا په بېلا بېلو برخو کې عامه پوهاوی ورکړل شوی دی.

البسه: په لنډ مهاله کمپونو کې د اړتیا سره سم کډوالو  ته خیمې او کمپلې او وېشل شوي دي.

مخابرات: د مخابراتي خدمتونو د ادارې له لوري راستنو شویو کډوالو  ته ۸۳ عدده سیمکارتونه په وړیا توګه چې وړیا دقیقې او د انټرنټي بستې هم په کې فعاله وې، وېشل شوي دي.

نیمروز

ورېښمو لار

د ثبت، تثبیت او استقبال کمېټه:

د ورېښمو له لارې ۴۵ کورنۍ چې د غړو شمېر یې ۱۸۵ تنه و، هېواد ته راستنې او ثبت شوې دي او همدا راز ۵٦۳ تنه مسافر وطن ته راغلي دي.

د مالي چارو د تنظیم کمېټه:

د مالي چارو د تنظیم کمېټې له لوري له ۳۷ کورنیو سره ټولې ۲٦۲ زره افغانۍ مالي مرسته شوې.

د خدماتو او روغتیايي چارو کمېټه:

په نیمروز کې راستنېدونکو کډوالو  ته د روغتیا په شمول، بېلابېل خدمات وړاندې شول:

مخابرات: راستنو شویو کډوالو  ته ۴۵ عدده سیمکارتونه، په وړیا توګه چې وړیا دقیقې او انټرنېټي بستې هم په‌کې فعاله وې، وېشل شوي دي.

د اطلاعاتو او عامه پوهاوي کمېټه:

د نیمروز ولایت ورېښمو بندر کې کډوالو  ته عامه پوهاوی ورکړل شوی. یادو کډوالو  ته د دوی د ثبت، لېږد، مالي مرستو، لنډ مهاله مېشتېدنې او همدرانکه د هېواد، اسلامي نظام، مهاجرت، صبر او زغم، ښوونې او روزنې په اړه ګټور پوهاوی ورکړل شوی.

هـــــــرات

اسلام کلا

د ثبت، تثبیت او استقبال کمېټه:

د اسلام کلا له لارې ۱۵ کورنۍ چې د غړو شمیر یې ۳۳ تنه کیږي، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري نن په اسلام کلا بندر کې له ۲٦ کورنیو سره ټولې ۱۹۲ زره افغانۍ مرسته شوې.

د ټولو کمېټو د بېلابېلو کړنو ټولیز ارقام په لاندې توګه دي:

ثبت شوي کډوال: ۱۳۰ کورنۍ، ۵۸۰ وګړي

لېږدول شوي کډوال: ۱۷ کورنۍ، ۹۵ وګړي

مرسته شوي کډوال: ۱۲۸ کورنۍ

وېشل شوي سیمکارتونه: ۱۹۳ عدده

د عامې روغتیا وزیر مولوي نور جلال جلالي د عامې روغتیا وزارت له اړوندو رییسانو سره ناسته کړې.

په دې ناسته کې د روغتیايي سیستم د پرمختګ، له نړیوالو موسسو سره پر موثرو اړیکو، د روغتیا په برخه کې د موازي پروژو پر کیفیت او موثریت او په روغتیايي سیستم کې د شته ستونزو په نښه کولو او د حل لارو موندلو پر موندلو خبرې شوې دي.

په دې ناسته کې چې د خوړو او درملو مرستیال مولوي حمدالله زاهد هم شتون درلود د خصوصي سکتور له لوري د وړاندې کېدونکو خدماتو پر ارزونې او څارنې هم بحث شوی، چې پر مرسته به یې له خصوصي سکتور نظارت لا پیاوړی او د کیفیت په برخه کې به موثریت ولري.

د ملي دفاع وزارت ویلي؛ د دې وزارت ستر درستیز د مخابرې او معلوماتي تکنالوژي ریاست د ظرفیت لوړولو له دوه میاشتني له بېلابېلو مسلکي زده کړو له دریمې دورې څخه ۵۱ تنه ځوان منسوبین له مسلکي کورسونو څخه د یو لړ ځانګړو مراسمو په ترڅ کې فارغ شول.

دغه مراسمو کې د مخابرې او تکنالوژې ریاست رییس مولوي صلاح الدین خویدم پخپله وینا کې ځوان فارع شویو منسوبینو ته ویلي، خپلو کارونو ته پاملرنه ولرئ او په کارونو کې مو غفلت مه کوئ، کوښښ وکړئ چې اداره د خپلو اصولو اړوند پرمخ یوسئ او د خپلو مشرانو اطاعت کوئ.

همداراز د ملي دفاع وزارت اړوند ۲۱۵ عزم قول اردو ښوراب ښوونیز مرکز څخه د بېلابېلو قطعاتو او جزوتامونو ۹۵۰ تنه ځوان منسویین له درې میاشتنیو مسلکي زده کړو څخه وروسته د یو لړ مراسمو په ترڅ کې هم فارغ شوي.

په دغو مراسمو کې د ملي دفاع وزارت ګڼ شمېر مسولینو ګډون کړی وو.

مسولینو فارغانو ته د اعداد او جهاد سربېره د هېواد په ملي او اسلامي ارزښتونو عالمانه ويناوې کړي. دوی په خپلو ویناوو کې ځوان فارغ شویو منسوبینو ته ویلي؛ همدا پوځ به د خپلو ولسونو، خاورې، اسلامي او ملي ارزښتونو دفاع کوي.

غونډه د معسکرو په نظامي ، رزمي او ورزشي حرکاتو او بری لیکونو په ورکولو سره پای ته ورسېده.

د کندهار ولایت مقام مطبوعاتي دفتر ویلي، د ملګرو ملتونو د سیاسي استازولۍ (یوناما) مشرې روزا اوتونبایوا د کندهار له مرستیال والي ملا محمد صادق انقلابي سره لیدنه کړې.

په دې لیدنه کې د ملګرو ملتونو د سیاسي استازولۍ (یوناما) مشرې روزا اوتونبایوا ویلي، غواړي د کندهار کروندګرو سره د کوکنارو د بديل کښت اړوندو برخو کي مرسته وکړي.

د  یوناما مشرې زياته کړې، د افغانستان په درې کلنه کاري موده کې ورته اسلامي امارت د ښه کار کولو غوره زمینه برابره کړې ده.

نوموړې ویلي؛ تېر کال یې د ملګرو ملتونو د بېلابېلو ادارو په همکارۍ ۲۶ میلیونه افغانانو ته بشري مرستي رسولي او هڅه کوي، ترڅو د افغانستان لپاره مالي بودیجه په راتلونکي کې ډېره کړي، چي دلته د بشري مرستو سره ـ سره نوري اړیني پروژې هم پلي شي.

د کندهار له مرستیال والي ویلي، اوس په افغانستان کي امنیت بشپړ ټینګ شوی دی او تر بل هر وخت پانګې اچونې ته زمینه برابره شوې ده.

ملا محمد صادق انقلابي د ملګرو ملتونو له استازې غوښتنه کړې، ترڅو د خلکو لپاره بنسټیزې پروژې پلي کړي، د نشه‌يي توکو د بدیل کښت په برخه کې دې ژر تر ژره عملي ګامونه واخلي او هم په نشه د روږدو کسانو د درملني په برخه کي له اړوند ادارو سره بشپړه همکاري وکړي.

د ریاست الوزرا سیاسي مرستیال مولوي عبدالکبیر په کابل کې د قطر د سفارت له مستشار مردف القاشوطي سره لیدنه کړې.

په دې لیدنه کې مردف القاشوطي ویلي، قطر له افغانانو سره خپلو بشري مرستو ته دوام ورکوي او غواړي په بېلابېلو برخو کې له اسلامي امارت سره خپله همکاري پراخه کړي.

نوموړي زیاته کړې، د دوه اړخیزه اړیکو پر بنسټ به قطر یو شمېر ځوانانو ته د بانکدارۍ په برخه کې د ظرفیت لوړولو لنډمهاله زده کړې برابرې کړي.

ښاغلي القاشوطي همداراز د اسلامي امارت او قطر ترمنځ د اړیکو ارزښت ته په اشارې ویلي، هڅه کوي چې د کابل ـ دوحې ترمنځ مستقیم پروازونه پیل شي.

د ریاست الوزرا سیاسي مرستیال نوموړي ته د ښه راغلاست ترڅنګ د اسلامي امارت او قطر ترمنځ د همکاريو او مثبتو اړيکو پراختيا ستایلې او ياد هېواد يې د افغانانو ښه دوست ياد کړی.

مولوي عبدالکبیر زياته کړې، په دوحه کې د افغانستان په اړه د قطري چارواکو په همکارۍ جوړېدونکې غونډې د قدر وړ دي.

سیاسي مرستیال څرګنده کړې؛ قطر د اسلامي امارت په بهرني سیاست کې مهم ځای لري او کابل له دوحې سره په اقتصادي، سیاسي، ښوونیزو، صنعت او د پانګونې په برخو کې دوه اړخیزو همکاریو ته لېواله دی.

مولوي عبدالکبیر ویلي، له نړۍ سره د اسلامي امارت سیاسي اړیکې د پراختیا په حال کې دي او افغان حکومت له اسلامي نړۍ څخه هیله لري چې په خپلو هېوادونو کې افغان ځوانانو ته د لوړو زده کړو زمینې برابرې کړي.

د‌ ليدنې په پای کې سیاسي مرستیال د فلسطین موضوع په اړه د قطر د دریځ او سیاست ستاینه کړې او د اسلامي نړۍ مسولیت ته په اشارې یې ویلي، اسلامي امارت د فلسطین د خپلواک دولت غوښتونکی دی.