د ریاستالوزرا اقتصادي مرستیال ملا عبدالغني برادر اخوند د هېواد شمالي ولایتونو ته د خپل سفر پر ترڅ کې نن د روان ۱۴۰۴ لمریز کال د سنبلې میاشتې په ۱۱ نېټه په جوزجان ولایت کې د دښتې لیلې د شهیدانو مزار ته ورغی او د هغوی سپېڅلې ارواح ته یې دعا وکړه.
د ریاستالوزرا اقتصادي مرستیال د دښتې لیلې د شهیدانو قربانۍ نه هېرېدونکې وبللې او زیاته یې کړه، د اسلامي نظام د اقامې په لاره کې د هغوی قربانۍ بې سارې دي او اسلامي امارت به د هغوی د ارمانونو پوره کولو لپاره پوره هڅه وکړي.
د لوړو زدهکړو وزیر په کابل کې د قزاقستان له سفیر سره د دواړو هېوادونو د پوهنتونونو ترمنځ د ماسټرۍ او دوکتورا په کچه د ګډو پروګرامونو د جوړولو سربېره د علمي او اکاډمیکو همکاریو پر لا پراختیا ټینګار کړی.
په دې لیدنه کې شیخ ندا محمد ندیم ، افغانستان ته د یاد هېواد د استادانو د را استولو، د لابراتوارونو تجهیز، د تحصیلي نصاب پیاوړتیا او د پوهنتونونو استادانو لپاره د لنډ مهاله پروګرامونو جوړولو برخو کې د همکارۍ غوښتنه کړې ده.
دغه راز ګزیز اکباسوف ډاډ ورکړی، چې دغه غوښتنې به له خپلو چارواکو سره شریکې کړي.
نوموړي د وروستۍ زلزلې له قرباینانو سره خواخوږي ښودلې او ډاډ یې ورکړی، چې هېواد یې په هر ډول شرایطو کې د افغانانو ترڅنګ ولاړ دی.
د ریاستالوزرا اقتصادي مرستیال ملا عبدالغني برادر اخوند تېره ورځ د روان ۱۴۰۴ لمریز کال د سنبلې میاشتې په لسمه نېټه په کندوز ولایت کې د کندوز سپين زر سوداګریزو مارکېټونو د جوړېدو چارو پرانیسته وکړه.
ملا عبدالغني برادر په لومړي سر کې په مشرقي ولایتونو کې د تېرې شپې د زلزلې له امله شهیدانو ته د جنت او ټپیانو ته د بېړنۍ روغتیا دعا وکړه او د هغوی کورنیو ته یې تسلیت وړاندې کړ.
نوموړي ځان له زلزله ځپلو کورنیو سره په دې غم کې شریک وباله او ویې ویل، د اسلامي امارت ټول اړوند مسوولین لاس پکار دي او له شته امکاناتو څخه په کار اخیستو یې د پېښې سیمو ته رسېدنه کړې ده.
ورپسې د ریاستالوزرا اقتصادي مرستیال د کندوز سپين زر سوداګریزو مارکېټونو د جوړېدو چارو پرانیستغونډې په مراسمو کې وویل، د عامه سکتور ترڅنګ د خصوصي سکتور له لوري په هره کچه پانګونه د هېواد د اقتصادي ودې مهمه برخه تشکیلوي.
نوموړي زیاته کړه، د پانګونې له مخې په هېواد کې دننه د ناخالص تولید او صادراتو کچه زیاتېږي، صنعت وده کوي او په ټوله کې ورسره د هېواد عاید زیاتیږي چې دا پر ټولنیزه هوساینه مثبت تاثیر لري.
د ریاستالوزرا اقتصادي مرستیال په کندوز ولایت کې د عامه خصوصي مشارکت له لارې د درېیو سوداګریزو ودانیو جوړېدل مهم وبلل او له اړوندو شرکتونو څخه یې وغوښتل، چې خپل فعالیتونه د ټولو معیارونو په پام کې نیولو سره په پوره صداقت او روڼتیا ترسره کړي.
ملا عبدالغني برادر اخوند د اسلامي امارت له لوري ټولو سوداګرو او پانګوالو ته ډاډ ورکړ، چې ټولو ستونزو ته به یې پر وخت رسېدنه کېږي او په ټولو برخو کې به ورسره اړینه همکاري کوي.
د یادونې وړ ده، چې په دې پروژو کې د پینځه میلیارده او ۴۲۶ میلیونو افغانیو په پانګونې د سپين زر نړیوال سوداګریز مرکز چې په ۶۳ جریبه ځمکه د درېیو کلونو په موده کې جوړیږي.
همدارنګه د ۳۰۰ میلیونو افغانیو په پانګونې د سیمسارۍ سوداګریز مارکېټ چې پر دوه جریبه ځمکه په یو کال کې او د ۵۷۶ میلیونو افغانیو په پانګونې د لوښو خرڅونې او برېښنايي سامان الاتو مارکېټ چې په دوه جریبه ځمکه په یو کال کې جوړیږي، شاملې دي.
د لوړو زده کړو وزیر شیخ ندا محمد ندیم په کابل کې د جاپان له سفیر تاکویوشي کورومایا سره لیدنه کړې.
په دې لیدنه کې د لوړو زده کړو وزیر په افغانستان کې د جاپان سفیر د بریالي ماموریت یادونې ترڅنګ، د جاپان د مثبتو سیاستونو څخه خپله خوښي څرګنده کړې ده.
شیخ ندا محمد ندیم ویلي، چې جاپان د اسلامي امارت او د افغانستان خلکو دیني او کلتوري ارزښتونو ته پر درناوي او مثبت چلند سره خپلې اړیکې په ښه توګه ساتلې دي او موږ له ټولو نږدې او لرې هېوادونو سره د داسې ښو اړیکو غوښتونکي یو، چې پر متقابل درناوي ولاړې وي.
نوموړي د تاریخ په اوږدو کې او په ځانګړي ډول په وروستیو څلورو کلونو کې د جاپان له مرستو او همکاریو څخه مننه کړې او د دغو همکاریو پر پیاوړتیا او دوام یې ټینګار کړی دی.
وروسته د جاپان سفیر تاکویوشي کورومایا، د هېواد په ختیځ کې د وروستۍ زلزلې په تړاو د خواخوږۍ مراتبو وړاندې کولو تر څنګ، زیانمنو شویو خلکو لپاره د مرستې چمتووالی اعلان کړی دی.
تاکویوشي کورومایا په دغه لیدنه کې د خپل ماموریت پای ته رسېدو ته په اشارې سره ویلي، افغانستان او جاپان اوږد مهالې اړیکې لري او موږ به دا ښې اړیکې لا پسې وغځوو.
نوموړي په افغانستان کې د خپل ماموریت څخه خوښي څرګنده کړې او زیاته کړې یې ده، چې دغه ماموریت به یې نوی سفیر په غاړه واخلي.
دغهراز ښاغلي تاکویوشي کورومایا ویلي، چې افغانستان د ښه پرمختګ پر لور روان دی.
د عامې روغتیا وزیر مولوي نور جلال جلالي له مل پلاوي سره ننګرهار او کونړ ته د زلزلهځپلو هېوادوالو د روغتیايي خدمتونو د ارزونې او هر اړخیزې رسېدنې په موخه سفر وکړ.
مولوي نور جلال جلالي، چې نورو مسوولینو یې هم ملتیا کوله، لومړی ننګرهار او له هغه ځایه د کونړ نورګل ولسوالۍ مزار درې او ودیر سیمو ته، چې ډېر اوسېدونکي یې زیانمن شوي، سفر وکړ.
د عامې روغتیا وزارت وايي، چې د دغه سفر موخه د زلزلې له کبله د زیانمنو شویو هېوادوالو لپاره د روغتیایي خدماتو او اړتیاوو ارزونه، د روغتیایي خدماتو رسونه، د ټپیانو د لېږد له پروسې کتنه او د سیمې د وضعیت له نږدې لیدنه دی.
ښاغلي وزیر د دې سفر په ترڅ کې له روغتیایي مسوولینو، بنسټونو او ولسي وګړو د هڅو قدردانی وکړ او اړونده مسوولینو ته یې د لا ښو خدماتو سپارښتنې وکړې.
د یادونې وړ ده، چې د زلزلې له پېښې راهیسې، د عامې روغتیا وزارت د رهبرۍ د لارښوونې له مخې، په څلورو ولایتونو او د کابل په مرکز کې روغتیایي مراکز د عاجل حالت د ځواب ویلو لپاره چمتو دي.
د دې ترڅنګ، د رهبرۍ په لارښوونه روغتیایي ټیمونه تېر ماښام سیمې ته رسېدلي او د ژغورنې عملیات لا هم روان دي او له تېرې شپې تر دې دمه په کونړ، ننګرهار او لغمان ولایتونو کې د سلګونو ټپیانو درملنه ترسره شوې ده.
د هېواد د وسلوال پوځ لوی درستیز ستر جنرال قاري محمد فصیح الدین “فطرت” د ننګرهار او کونړ ولایتونو د وروستۍ زلزلې د قربانیانو له کورنیو سره خپله خواخوږي څرګنده کړې ده.
ستر جنرال فصیح الدین په خپل پیغام کې ویلي، په ډېره خواشینۍ سره یې خبر ترلاسه کړ، چې تېره شپه د یوې زورورې زلزلې له امله په یادو ولایتونو کې یو شمېر هېوادوال شهیدان شوي، ګڼ نور ټپیان شوي او خلکو ته یې درانه مالي زیانونه اړولي دي.
نوموړي د پېښې د قربانیانو کورنیو ته د ژورې خواخوږۍ او غمشریکۍ مراتب وړاندې کړي او د ټولو شهیدانو لپاره یې د جنت الفردوس، د ټپیانو لپاره بشپړې روغتیا او د پاتې شویو کورنیو لپاره د جمیل صبر دعا کړې ده.
همداراز، د وسلوال پوځ لوی درستیز ټولو قطعاتو او اړوندو بنسټونو ته لارښوونه کړې، څو په وخت سره د زیانمنو شویو خلکو د ژغورنې، مرستې او بېړنیو اړتیاوو د پوره کولو په برخه کې له هېڅ ډول هڅې ډډه ونه کړي.
ستر جنرال قاري فصیح الدین فطرت په پای کې هیله څرګنده کړې، چې الله تعالی دې افغانستان او د دې هېواد ولس له هر ډول طبعي پېښو او مصیبتونو څخه وساتي.
د پاکستان د کورنیو چارو وزیر محسن نقوي د اسلامي امارت د کورنیو چارو له وزیر خلیفه سراجالدین حقاني سره ټلیفوني خبرې کړي.
کورنیو چارو وزارت وایي، په دې خبرو کې ښاغلي نقوي د هېواد په ختیځو ولایتونو کې د وروستۍ زلزلې له قربانیانو سره غمشریکي کړې او د ټپیانو د درملنې او د بشري مرستو په برخه کې یې د همکارۍ ډاډ ورکړی.
ورته مهال خلیفه سراجالدین حقاني د نوموړي له خواخوږۍ او مرستې ته د چمتووالي مننه کړې او ترڅنګ یې په خیبر پښتونخوا او پنجاب کې د وروستیو سېلابونو زیانمنو شویو سره غمشریکي کړې ده.
د هند بهرنیو چارو وزیر ډاکټر جېشنکر د اسلامي امارت د بهرنیو چارو له وزیر مولوي امیرخان متقي سره ټيلیفوني خبرې کړې دي.
ښاغلي ډاکټر جېشنکر د تېرې شپې د زلزلې له امله د اوښتو زیانونو په پار غمرازي شریکه کړې او د بېړنیو بشري مرستو چې پکې زر خیمې او ١٥ ټنه خوراکي توکي شامل دي، اسلامي امارت ته د تسلیمېدو خبر هم ورکړی دی.
نوموړي ویلي، چې هېواد به يې د درملو او خواړو په برخه کې نورې اړینې مرستې هم وکړي.
دغهراز مولوي امیرخان متقي د هند د بهرنیو چارو له وزیر ښاغلي جېشنکر څخه په دې لوی ناروین کې د غمشریکۍ،
خواږي او د افغانانو د لاسنیوي څخه مننه کړې او ډاډ یې ورکړی، چې پر وخت به یې اړمنو ته ورسوي.
همدارنګه د پاکستان د لومړي وزیر مرستیال او د بهرنیو چارو وزیر محمد اسحاق ډار د اسلامي امارت د بهرنیو چارو له وزیر مولوي امیرخان متقي سره ټيلیفوني خبرې کړې دي.
ښاغلي ډار د افغانستان په ختیځو سیمو کې د تېرې شپې په زلزله کې د اوښتو زیانونو له امله د تسلیت مراتب وړاندې کړي او په دې غم کې یې ور سره ځان شریک بللی دی.
دغه راز مولوي امیرخان متقي په دې لوی ناروین کې د غمشریکۍ او خواخوږۍ له امله له ښاغلي اسحاق ډار څخه مننه کړې ده.
